Wanasiasa wanakwamisha uwekezaji Arusha: DC

Mkuu wa Wilaya ya Arusha akiwa na watendaji wa Taasisi za Serikali zinazohusika na uwekezaji katika Mkoa wa Arusha

 Na Seif Mangwangi, Arusha

SIASA mbaya katika Jiji la Arusha zimeelezwa kukwamisha  wawekezaji kuwekeza katika Jiji hilo na hivyo kuikosesha Serikali mapato mengi ambayo yangetokana na fursa hizo.

Hayo yameelezwa Leo Machi 23, 2023 na Mkuu wa Wilaya ya Arusha, Felician Mtahengerwa  alipokuwa akifungua Kikao kilichokutanisha idara na taasisi za Serikali Mkoa wa Arusha ambazo zimekuwa zikihusika moja kwa moja  na uwekezaji.

Mkuu wa Wilaya ya Arusha Felician Mtahengerwa akifungua Kikao maalum Cha watendaji wa Serikali wanahohusika na uwekezaji ndani ya Jiji la Arusha

DC Mtahengerwa amesema wanasiasa wa Jiji la Arusha wamekuwa wakikwamisha juhudi za viongozi wa Serikali kukuza uwekezaji kwa kuweka vikwazo mbalimbali pale ambapo mwekezaji amekuwa akijitokeza na kushindwa kuendelea kutokana na vikwazo hivyo.

Amewataka watendaji wa Taasisi za Serikali zinazohusika moja kwa moja  na uwekezaji kutojiingiza kwenye siasa hizo mbaya na badala yake wamsaidie Rais Dkt Samia Suluhu Hassan kuongeza uwekezaji na kuinua uchumi wa nchi.

Aidha ameziagiza taasisi hizo kuandaa kitabu kimoja kitakachokuwa kimeainisha maeneo ya uwekezaji, na namna mwekezaji ataweza kufaidika na maeneo hayo ili kuvutia wawekezaji wengi kuja Jijini Arusha.

Meneja wa kituo Cha uwekezaji Kanda ya Kaskazini Daudi Riganda akizungumza katika kikao hicho

Mkuu wa kituo Cha uwekezaji Kanda ya Kaskazini  Daudi Riganda amesema kituo hicho kimeitisha kikao hicho kwa lengo la kufanyia mapitio sheria mpya ya uwekezaji namba10 ya mwaka 2022 ikiwa ni marekebisho ya sheria ya uwekezaji ya mwaka1997 pamoja na kukusanya maoni ya wadau wa uwekezaji ili kuyapatia ufumbuzi wa haraka.

Amesema katika sheria hiyo mpya, kituo Cha uwekezaji kimefanyia mabadiliko sheria nyingi ikiwemo ya mitaji ya uwekezaji kwa wazawa na wageni lakini pia kuongeza muda wa kuanza kulipia kodi, pamoja na idadi ya wafanyakazi wanaotakiwa kuwepo katika eneo linaloanza uwekezaji.

Aidha Riganda amesema kituo cha uwekezaji kimeanzisha utaratibu wa kutoa huduma za uwekezaji katika kituo kimoja ( One stop facilitation center) ambapo taasisi zote za Serikali zinazohusika na nyaraka za uwekezaji nchini zitakuwa katika kituo hicho.

" Ukiachilia mbali utaratibu mpya wa kutoa huduma za uwekezaji katika eneo Moja kwa taasisi zote husika, Serikali  iko kwenye hatua za kukamilisha dirisha la utoaji huduma kwa njia za kielekroniki, na taasisi 12 tayari zimeunganishwa lengo likiwa ni kushughulikia utoaji vibali, leseni kwa urahisi na uharaka, ndani ya siku3," amesema Riganda.

Washiriki wakifuatilia

Ametaja taasisi zilizounganishwa katika mpango huo ni pamoja na Nida, OSHA, Brela, TMDA, TRA, TBS, OSHA, Ardhi, idara ya kazi, Uhamiaji, NEMC na  Tanesco ambapo mwekezaji hatopata tabu kufuata huduma mbali.

Katibu Mtendaji wa Chama Cha waendesha utalii Tanzania ( TATO), Cyrill Ako amesema wawekezaji katika sekta ya utalii wamekuwa wakiomba kufanyiwa mabadiliko kwa sheria ya District Service Levy, ambayo imekuwa kero kubwa kwao baada ya kila Halmashauri kufanyia usumbufu kampuni za utalii zikitaka kupewa Kodi hiyo.

" Sisi kama TATO tunaomba hii sheria ifanyiwe mabadiliko, gari ikitoa na mgeni kuanzia KIA inapita Wilaya nyingi sana hapa katikati, kila Halmashauri inakuja ofisini kudai Kodi Ile Ile, kwanini isiwekwe sehemu Moja tukajua tunatakiwa tulipie kiasi Fulani badala ya usumbufu kwa kila mtu?," alihoji Akko.

Washiriki wakifuatilia hotuba ya mgeni rasmi, Mkuu wa Wilaya ya Arusha, Felician Mtahengerwa